www.Avaaz.org
Avaaz ta existi apenas algun aña pero a desaroya den e tempo cortico ey como e red di activista mas importante y poderoso riba internet.
Avaaz (locual ta nifica ‘voz’ den varios idioma) e cuminsa na 2007 a base di un mishon democratico simpel: organisa ciudadano di tur pais pa cera e abismo cu tin entre e mundo manera e ta awor y e mundo manera mayoria di hende ta desea.
Avaaz ta facilita miyones di hende di tur categoria y di henter mundo pa cuminsa acshon pa asunto importante riba nivel mundial, regional of nashonal, desde corupshon y pobresa te cu conflicto y cambio di clima. Su manera di traha pa medio di internet ta haci posibel cu miles di iniciativa particular, maske con chikito, ta transforma rapidamente den un movimiento conhunto y poderoso.
A base di encuesta na henter mundo Avaaz a compila e siguiente lista di prioridad pa su terenonan di atenshon:
- Lucha contra corupshon politico, incluso e poder di empresa riba gobierno.
- Maneho economico cu ta duna preferencia na interes general en bes di interes di un elite chikito.
- Prevenshon di un cambio di clima catastrofal.
- Trata na solushona e problemanan di esclavitud y traficashon di hende.
- Protecshon di nos salud y nos cuminda, incluso contra uzo di organismo manipula geneticamente.
- Protecshon di animal y mata menasa y biodiversidad.
- Protecshon di selva y di e derechonan di pueblo indigena.
- Protecshon di e derechonan di hende muhe.
- Terminashon di guerra na Syria.
- Yuda e forsanan democratico pa vence dictadura den e paisnan arabe.
E balornan mas importante cu ta uni nos den esaki ta:
- Humanismo y globalisashon –manera Gandhi di: ‘na prome luga mi ta hende y despues numa mi ta ciudadano di mi pais’.
- Igualdad – tur hende ta igual, precioso y tin mesun derechonan, irespecto su rasa, fe, sexo, nashonalidad of orientashon sexual.
- ‘Democracia participativo’ –den un democracia politico, discushon honesto entre ciudadano mester determina kico ta miho pa comunidad en bes di wega sushi entre interes personal.
- Responsabilisashon – gobierno mestar ta transparente y duna cuenta na su ciudadanonan.
- Responsabilidad pa cu comunidad –nos tin un responsabilidad pa contribui na comunidad y no busca solamente nos propio interes, sino interes general.
- Responsabilidad personal – nos mes mester refleha e cambio cu nos kier mira den mundo.
- Curashi, , compashon, integridad y honestidad – ningun di nos ta perfecto, pero nos mester purba di pone e balornan aki mas cu ta posibel den practica.
- Ecologia – humanidad ta forma parti di un red interdependiente cu nos ambiente natural y nos mester cuid’e.
- Derecho pa animal – animal ta merece nos compashon y ta merece di tin derecho.