CONFLICTO & HARMONIA

Harmonia ta parce asina logico cu masha tiki hende ta precupa nan mes pesey. Consecuentemente tin masha tiki hende cu realmente ta biba ‘den harmonia’. Hopi mas hende mester bringa (hopi biaha literalmente) continuamente pa sobrebibi. Mayoria di biaha esey ni sikiera ta consecuencia di nan propio escogencia.

Historia di humanidad pa un parti importante ta caracterisa pa conflicto. Conflico entre hende individual, entre grupo, pais y ‘entre hende y su medio ambiente’. Pesey tin hopi motibo. Un motibo importante cu ta hunga un papel den hopi conflicto ta codishi (‘greed’). Es ta e ambishon pa acumula mas tanto placa y propiedad posibel. Frecuentemente esey ta bay a costo di otro hende of di salud di naturalesa. Di e manera aki e codishi aparentemente natural di hende a percura pa hopi miseria y daño.

Codishi pa hopi hende ta un motivashon poderoso. Pero hustamente pasobra e ta causa asina hopi consecuencia dañino pa e gran mayoria di humanidad y naturalesa, tur esnan cu ta sufri e consecuencianan, mester combati’e. Esey ta solamente posibel si ta bira conciente di e inhusticia, kico ta e causanan y kico por haci den su contra.