E RETO DI MATRIMONIO DI HOMOSEXUAL

Na aña 2005 matrimonio di homosexual tawata un tema hopi controversial na Aruba. Adversario tawata basa nan mes riba Testamento Bieu cu ta priminti un cantidad di castigo celestial na e infeliznan cu ‘deseo imoral’. Ministro di Husticia a subi baricada declarando cu matrimonio di homosexual no ta pertenece den cultura rubiano. Clero y Ministro di Husticia a uni forsa den un caminda di cruz pa proteha Aruba contra e peliger aki.

Manera sa pasa mas biaha na Aruba, emoshon fuerte cu argumento curioso tawata guia e discushonnan. Asina e textonan yen di menasa den Biblia Bieu pa hopi tempo caba a keda contradeci pa Testamento Nobo cu su mensahenan cla di amor y ‘no huzga otro si bo mes ta un pecador’. Mesun dudoso tawata e apelashon cu Ministro di Husticia a haci riba ‘nos cultura’, El a referi na un custumber di homber pa plama nan semiya con cu para keda riba nos isla cu hopi ‘yiu sin tata’ como resultado? Of mas bien e tawatin e percentahe halto di divorcio (te asta 70%) na bista?

E postura di iglesia catolico pa cu homosexualidad tambe a ser uza como argumento den e discushonnan. Den esey no a tuma na considerashon e falta grandi di tolerancia, inhusticia sistematico y otro fayo maligno (cu de bes en cuando a conduci na miles y miles di morto). Te dia di awe iglesia catolico ta sigui cu e tradishon aki. Su posishon pa prohibi anticoncepshon den un mundo yen di circumstancia miserabel pa motibo di sobrepopulashon ta incomprendibel. E practica pa tapa e abuso di mucha dor di sacerdote a permiti e abuso ey pa hopi tempo mas. Den e luz aki tin hopi duda si Iglesia tin e autoridad moral pa excomulga matrimonio di homosexual. Di berdad e diferencia den sexo ta asina importante cu atrobe mester organisa un caminda di cruz cu despues, mescos cu a pasa cu hopi otro tema, mester wordu considera como un eror?

Ta incorecto pa considera custumber cu ta parti di ‘nos cultura’ como algo incambiabel. Tur cultura ta den proceso di cambio. Asina e custumber di dal mucha a keda remplasa pa e concepto cu den un bon educashon no tin lugar pa dal. Den ‘nos cultura’ tawata normal cu hende muhe no sa haya hopi formashon, pasobra su tarea na mundo tawata consisti di pari yiu. Mescos ta conta pa hende cu handicap, cu pa hopi siglo a ser considera como un ‘castigo di Dios’, mientras cu te cu recien a considera como masha normal e trato inhumano di e poblashon scur di pais desaroya occidental manera Estados Unidos y Sur-Africa.

Cu ta nenga homosexual e matrimonio religioso a base di e doctrina biblico no ta ningun argumento pa obstaculisa e posibilidad di un matrimonio pa ley. Hopi pais occidental a separa Estado y Iglesia y a desaroya un comunidad pa hende cu diferente caracteristica. Pa conbibi pacificamente cu otro a acorda cu no por discrimina a base di religion, rasa, preferencia politico of orientashon sexual. Den e contexto aki no por sigui defende pa nenga homosexual derecho cu heterosexual sí tin. Esaki tin mas balor si tuma na cuenta cu varios areglo legal manera esun di penshun y herencia, cu en principio ta conta pa tur ciudadano, ta mara na matrimonio civil. Consecuentemente no por sigui mantene e prohibishon pa matrimonio di homosexual den nos estado di derecho a base di argumento dudoso.