FIGURANTE

Despues di nengamento di gobernador pa firma presupuesto di 2014, parlamentario di AVP a reacshona hopi indigna. Ta ki mishi gobernador neglisha e decishon di e organo mas halto di Aruba, esta Parlamento, cu ya caba a aproba e presupuesto? Haciendo esey, gobernador a viola e respet necesario cu parlamentario ta exigi pa nan mes.

Den filosofia di Trias Politica en berdad representante di pueblo tin un tarea sumamente importante si no ta esun principal. Pasobra ta nan ta esun cu a base di señal for di comunidad ta bin cu proposishon pa mehora su funcshonamento. Su meta ta pa mehora calidad di bida di mas tanto ciudadano posibel na un manera mas igual posibel. E representantenan ta controla elaborashon di nan proposishonnan pa gobernante pa cu su legitimidad y efectividad. Entre otro ta controla si gobernante a tene nan mes na regla di ley y uzo eficiente di e placa disponibel.

Segun Raport Calidad, inicia dor di AVP, e manera con parlamento di Aruba ta funcshona, ta dificulta e rol critico menshona hopi mes. Tanten cu parlamentario di e partido na mando ta candidato remplasante cu tiki voto cu mester controla nan ministro cu hopi voto preferencial, no por spera nada positivo. Consecuentemente tarea di parlamentario asina ta consisti mas bien di aplaudisa riba comando pa nan ministro-hefe, pa proteha nan contra critica y pa legalisa nan (mal)hechonan. Ya pa decada caba esey ta e codigo di comportashon di cada partido cu ta na mando.

Asina a desaroya un ´stempelparlement´ cu como organo di control ta aproba sin ningun critica e (mal)hechonan di su hefe (gobierno) asta retroactivo. Aparentemente no ta costa parlamentario ningun problema pa sacrifica interes general na bienestar di interes di nan ministro(nan) y partido. E maneho pa no protesta contra e cantidad grandi di nombrashon politico –cu pa decada ta e fayo politico principal- tambe ta un defecto serio. E practica aki ta nifica violashon di e principio di trato igual pa ciudadano cu consecuencia dramatico pa caha di gobierno. Den e sentido aki tambe nos representantenan di pueblo a laga comunidad na caya.

Disfuncshonamento di Parlamento ta cronico desde Status Aparte y ta encera tur partido politico tradishonal. Tanto Contraloria General (CG) como Ministerio Publico a yega di indica cu e disfuncshonamento aki di e organo di control mas importante en realidad ta anula nan esfuersonan. Un presidente anterior di CG asta a expone cu “nan mester observa cu duele cu Parlamento no ta discuti nan raportnan. Como consecuencia historia ta ripiti cada bes atrobe. Gobernashon tur biaha atrobe ta haci su mes culpabel na violashon di ley”. Como posibel causa pa disfuncshonamento di parlamento CG ta indica cu “ta scohe parlamentario a base di nan aspirashon politico y no di nan experticio financiero-economico y huridico. Probablemente esey ta motibo cu nan no por digeri e raportnan di CG”.

Riba dje den e practica na Aruba gobierno tampoco ta tuma Parlamento absolutamente na serio. Regularmente ta duna informashon extenso na ultimo momento prome of asta durante reunion pa studia y alabes discuti. Parlamentario di e partido na mando hopi biaha no ta haci ningun esfuerso serio pa expone eventual maneho incorecto di gobernante. Pero parlamentario di oposishon tambe ta faya pasobra nan sa falta di atende e reunion sin notificashon previo.

A pesar cu patronahe politico ya caba durante 28 aña ta e causa principal di nos problemanan financiero y social, Parlamento no ta dedica ni tempo ni atenshon na busca posibel solushon; tampoco nan ta expone un vishon cla pa Aruba of ta busca solushon cu por pone un fin na e polarisashon entre berde y gel cu ta venena e ambiente politico. Of pa discuti e tema di financiamento di partido politico anke esaki ta forma un base importante pa corupshon; of pa investiga funcshonamento defectivo di e aparato gubernamental pa mehora calidad di servicio na bienestar di pueblo of pa busca solushon pa e problema extenso di alcohol, negligencia den educashon, corda pa un reflecshon comun riba funcshonamento deficiente di parlamento. Mas bien ta derocha tempo y placa escaso na viahe costoso pa Parlatino cu nunca a duna algun fruta pero cu nos parlamentario ta considera nan derecho sagrado.

Cu tur esaki nos parlamentarionan ta forma un peliger pa nos estado di derecho y consecuentemente nan ta mina nan propio derecho di existencia. Consecuentemente nos por puntra nos mes si no por reduci e cantidad di parlamentario considerablemente. Asina por deshaci di e concepto ekivoca tanto den departamento di gobierno como den Conseho di Ministro cu por compensa e falta di calidad cu suficiente cantidad. Ta un pica mortal pa sigui gasta nos bon placa cu cada bes mas ta bira mas escaso na hende cu ta cobra pa un rol principal pero ta funcshona simplemente como figurante.