MAL GOBERNASHON – 1

Na 2001 MEP a tuma gobernashon over di AVP. AVP a cera  e aña ey cu un fayo financiero di Afl. 28 miyon. MEP a multiplica e fayo aki na 2002 te na Afl. 72,9 miyon y na 2003 asta te na Afl. 172,4 miyon. E redoblashon di e fayo di 2003 pa un fayo di Afl. 353,6 miyon na 2004 ta nifica cu a multiplica e fayo original di 2001 casi 13 biaha.  Por a cubri e fayo aki solamente cu prestamo di instancia financiero den exterior. Sinembargo, Statuut ta determina den articulo 29 cu Gobierno di Reino mester duna permiso p’esaki. Gobierno di Aruba tawata conciente cu e base pa e prestamo tawata iresponsabel y cu tawatin e chens cu no lo haya permiso. Pesey a aplica un triki pa evadi e regla aki. Un banco local mester a haci e prestamo den exterior y pas’e despues como ‘prestamo local’ na gobierno. Entre otro pa tipo di asunto asina e debe nashonal a subi durante e gobernashon mas recien di MEP cu mas di Afl. 500 miyon pa Afl. 2,2 biyon na 2009. Esaki tawata representa 46% di e GDP. Pago di e interes di Afl. 100 miyon tawata un atentado pisa riba e medionan disponibel y consecuentemente riba e capacidad di pago di Aruba. E posibilididadnan pa invershon di gobierno a baha te na un minimo absoluto.

Entre otro pa motibo di e supuesto leak di VNO na unda un mail confidencial di e Representante di Hulanda na Aruba (VNO) cu informashon den un tono un tiki sarcastico tocante maneho di gobierno a sali afo, e relashonnan cu Hulanda, cu ya caba tawata malo, tambe a baha te na un profundidad absoluto. Asina el a iguala e relashonnan existente entre gobierno di Aruba na un banda y e dunadornan di trabou y sindicato na otro banda.

E gobierno nobo di AVP na 2009 a mehora for di un principio e relashonnan cu e partnernan social y Hulanda. Ademas e proyectonan espectacular pa un mehorashon integral di infrastructura por a carga e aprobashon di hopi hende. El a nifica un ruptura di e maneho tradishonal na unda a trata di tapa e descuido constante di edificio di gobierno y infrastructura. E uzo intensivo di propio oficina di mercadeo y e coperashon amplio sin critica di mayoria di prensa na alabansa di gobierno a conduci na un victoria electoral aplastante na 2013. Sinembrago, di biaha despues di elecshon e puitonan a cuminsa sali for di nan macuto.

Pa esnan cu a puntra nan mes na ki manera gobierno a financia drechamento di edificio y scol na werki, campaña costoso pa energia duradero, aporte financiero adishonal pa famia den problema, enbeyecimento di bario, dos tram, etc., di biaha despues di elecshon e contesta a sali na cla. A resulta cu gobierno a presta cantidad enorme di placa riba un escala nunca antes bisto y a hunga sinterklaas cu n’e. No a informa pueblo debidamente al respecto y asta a duna informashon falso na unda tawata ‘necesario’. Asina calculashon di Cft ta mustra cu e fayo financiero na 2014 tawata casi dobel di lo cual gobierno a indica. Mas di Afl. 440 miyon en bes di casi Afl. 235 miyon. Consecuentemente e debe nashonal a subi te na Afl. 3,8 biyon na 2014, o sea 80%di GDP. Riba e debe aki gobierno ta paga anualmente Afl. 190 miyon solamente na interes, o sea mas di Afl. 500.000,- pa dia. E interes aki ta representa 14% di e gastonan total di gobierno, mientras por lo general ta considera 5% como e maximo di gasto di interes cu un pais por carga responsablemente. Pa comunidad esaki tin como consecuencia cu lo corta of asta elimina subsidio di fundashon cu ta traha pa esnan mes debil den comunidad, cu no lo renoba contrato di trabou, cu lo aumenta BBO, cu lo tin posibel introducshon di impuesto di transacshon, etc.  Al fin y al cabo esakinan lo caba cu e intenshon di e prome gobernashon Mike Eman, esta di mehora e calidad di bida pa ciudadania. Ademas comunidad di Aruba lo mester paga e gastonan di e aventura aki durante decada.

Naturalmente e pregunta grandi ta con por a yega asina leu. A pesar cu oposishon ta purba freneticamente di pusha e situashon actual completamente den sapato di e gobierno actual mientras e ultimo aki ta ripiti incansablemente e historia di e herencia di 8 aña malgobernashon di MEP, por atribui e causa di e situashon financiero actual na casi 30 aña di malgobernashon sin interupshon. Crecemento di e fayo financiero bou di MEP manera describi ariba y e crecemento enorme di e debe nashonal bou di AVP ta simplemente e ilustrashonnan mas recien di un imagen general. Asina ta bira cla cu ambos a contribui na mesun manera na descarilashon di finansas publico. Y no tawata trata solamente di descarilashon, sino tambe di uzo di e placa na un manera cu segun practicamente tur raport di Conseho di Consulta y Controlaria General pa un parti significativo tawata dudoso. Asina e gobernante- y parlamentarionan di tanto MEP y AVP a viola un principio importante di bon gobernashon, es ta cu gobierno mester administra e placa disponibel na un manera eficiente y efectivo.

MAL GOBERNASHON - 2

E diferente gobiernonan no(t)a peca solamente contra e principionan di un bon administrashon financiero, pero tambe contra e principio di igualdad, otorgando privilegio na famia y amigo politico.  Nombrashon y promoshon sin limite di personal di gobierno a base di color politico durante decada ta consecuencia di a neglisha e principio aki. E situashon financiero penoso cu a resulta di e tradishon aki ta un violashon cla di e principio cu gobierno mester laga interes di comunidad prevalece den tur su decishonnan. Pero tambe e custumber di desvia frequentemente di e stipulashonnan legal pa cu destaho a base di argumento dudoso ta contra un principio importante, es ta cu gobierno mester actua a base di ley y no na un manera arbitrario. Como cu gobierno di Aruba (t)a tuma hopi decishon na un manera no-transparante y pues no-controlabel, integridad di gobierno continuamente ta un punto di discushon. Tanto parlamentario di partido como prensa ayega sa tapa esaki sistematicamente pa medio di atake riba oposishon en cuanto su fayonan durante su ultimo gobernashon.

Ta resulta cu e gobiernonan consecutivo di Aruba di ambos partido grandi  (t)a peca continuamente y riba escala grandi contra e principionan di bon gobernashon. Anke locual a menciona ariba ta un ilustrashon limita for di henter e spectro di violashon di norma, pa Hulanda esaki ainda no tawata suficiente motibo pa interveni mas prome a base di e ‘waarborgfunctie’ den articulo 43 di Statuut. Segun un director-general di asunto di Reino anterior, motibo di esaki tawata cu e situashon na Corsow y St. Maarten tawata hopi pio. Nan tawata exigi tur atenshon y energia di Hulanda. Compara cu e dos islanan ey, Aruba (e tempo ey!) tawata peanuts y pues a laga cos sigui su marcha. Pa comunidad di Aruba e postura ey a nifica cu e situashon a sigui empeora. Pero segun regla di democracia esey tawata su propio escogencia.  

A pesar cu e gobierno actual (t)a haci hopi esfuerso pa sconde e embergadura real di e crisis financiero pa e pueblo electoral, e mes tawata bon na haltura di seriedad di e situashon. Asina mes e no tawata forma ningun estimulo pa tuma despedida di e maneho tradishonal. Anke e cuerpo di empleado publico ya caba tawata pata pata di hende, e prome gabinete Mike Eman a haya lugar pa nombra centenares di hende. Esaki a aumenta e gasto di personal cu mas di Afl. 50 miyon pa aña. Hunto cu e aumento automatico di salario como consecuencia di e sistema salarial y e indexering acorda, ya caba solamente e gastonan aki, segun Cft, lo percura pa un aumento autonomo di presupuesto. Cada bes mas ta bira mas dificil pa financia esaki como cu e gastonan di enbehecimento tambe lo aumenta grandemente e añanan benidero. Consecuentement Cft ta premira cu debe nashonal lo sigui aumenta desde 2018 si no tuma medida drastico adishonal.

Sinembargo, no mester spera ‘medida drastico’ for di gobierno di Aruba. Pa tradishon ta hala reducshon necesario di personal di gobierno for di mesa dor di mustra riba e consecuencianan social di esnan concerni. Asina e ta mantene su maneho di personal cu e mes a crea y e ta pasa e gastonan di e  ‘maneho’ aki pa henter comunidad.

E postura hipocrito aki hunto cu negashon di realidad ta visibel riba tur tereno. E caso mas reciente tawata e atake riba gobernador pa motibo cu e no a firma presupuesto di 2014. E campaña cu tanto gobernante como parlamentario a hiba despues contra dje y Hulanda como su ‘hefe’ cu e argumento cu a viola constitushon, tawatin como meta pa sconde e motibo real (esta e situashon financiero dramatico y su consecuencianan) pa pueblo. Pero tambe specialmente lider di fracshon di AVP a comporta su mes hipocrito ora di cita repetidamente y cu hopi entusiasmo e opinion di Conseho  di Consulta en cuanto e caso aki.  Ta asina cu el a tapa e echo cu si e lo a haci uzo di e opinionnan di Conseho di Consulta (y otro organo di conseho di gobierno) durante tur e añanan anterior, e situashon financiero di Aruba nunca lo a sali for di control asina. Consecuentemente gobernador no lo tawatin ningun motibo pa haci uzo di e posibilidad di no firma presupuesto y pa somete esaki na un investigashon financiero a fondo. Al contrario, a neglisha e recomendashonnan en cuanto e maneho financiero di e instancianan menciona (y otro instancia internashonal) durante decada pa motibo di oportunismo partidista.

E actitud hipocrito aki di nos parlamentarionan ta un garantia cu e encuentro interparlamentario di Reino lo ocupa su mes atrobe cu asunto ‘marginal’. Tanten cu no ta discuti e situashon real di malgobernashon a fondo y abiertamente y no ta acorda acshon pa mehorashon, no por spera mucho cambio. Como cu e politiconan di e parti Caribense di Reino lo lo haci tur nan posibel pa mantene of asta fortifica ‘nan’(!) autonomia, pa e decadanan benidero e ciudadania lo sigui paga e cuenta di malgobernashon y su legitimashon pa parlamento. Simplemente no por spera otro di parlamentario cu cada bes atrobe e demostra cu nan guia principal ta interes di nan partido y ministro y cu ta prefera di fiesta cu nan biahenan di Parlatino en bes di ocupa nan mes cu asunto realmente importante.