maneho amateurista

Den un entrevista na februari 2015 parlamentario Wyatt-Ras a duna di conoce cu ya caba pa 20 aña tin problema cu Landslaboratorium y cu awor si un solushon ta urgente. Asina e ta ilustra un problema general den maneho di nos pais: problema ta keda drumi pa decada y gobierno ta tuma nan solamente na serio na momento cu situashon sali completamente for di man.

Pa decada caba e medionan di comunicashon ta menshona casi semanalmente cu mester desocupa scol pasobra nan ta den un situashon di deterioro asina malo cu permanencia continua di mucha y docente ta totalmente iresponsabel. Ta menshona asunto di promoshon y adaptashon di sistematica salarial di brandweer y polis pero cu ta keda drumi pasobra gobierno ta bisa aña den aña fo cu e ta ‘studiando’ e caso. Di servicio di ambulance cu pa añanan largo tawatin un flota di ambulance deficiente cu e consecuencia cu no por a garantisa asistencia inmediato den caso di accidente. Di edificio di gobierno na unda plafond ta cay abou, airco ta (dis)funshona alternativamente y na unda al fin y al cabo mester plama e empleadonan den diferente edificio. E lista ta sin fin. E esencia semper mescos. Den caso di edificio: mantenshon deficiente of totalmente ausente cu ta causa un decadencia continuo. Den caso di personal: posponemento di cualke decishon, sabiendo cu cada cambio tin implicashon grandi pa motibo di e aparato gubernamental exsesivo, combina cu e falta di curashi pa confronta empleado y sindicato cu e realidad. Pero semper a pusha e batatanan cayente pa dilanti locual semper a nifica cu e problemanan a empeora.

E consecuencia mas directo di e ‘maneho’ aki ta cu tumamento di acshon ora ta lat caba, hopi biaha ta mas cu redobla e gastonan. Pasobra no solamente mester remplasa en bes di drecha construcshon cu a daña completamente pa motibo di falta di mantenshon, pero tambe mester busca otro espacio cu hur halto pa alumno, personal of material, manera ta e caso awor cu varios scol y servicio di ambulance na Wayaca.

Un inconveniente adishonal pa instancia, departamento y personal cu ta depende di decishon di gobierno pa sigui debidamente cu desaroyo (natural) ta, cu gobierno ta viola sistematicamente e reglanan mas basico di decencia pa reacshona dentro di un tempo razonabel, lagando esnan concerni warda riba un reacshon no solamente durante siman-, pero asta luna- y de bes en cuando añanan largo. Riba dje ta wanta petishon pa subsidio di fundashon cu un tarea hopi importante pa comunidad manera Casa Cuna y SKOA cu e pretexto cu nan ta atrasa cu nan cuenta anual cu ta haci cu gobierno no tin bista riba necesidad dje aumento. Pa un gobierno, cu pa decada largo y contra stipulashon di constitushon, nunca a entrega cuenta anual of a entrega nan añanan lat y completamente deficiente, esaki ta un argumente masha vergonzoso mes. Esey ta conta na mesun manera pa e expectativa di e mesun gobierno cu fundashon y otro instancia mester mantene nan gastonan na mesun nivel di 10 aña pasa, mientras e mes a aumenta su gastonan aña den aña fo, mayoria di biaha pa motibo cuestionabel.

Anke e gobiernonan pa decada caba ta bati riba nan pecho pa nan supuesto exitonan riba tereno turistico, ningun gobierno a logra ainda pa traha espacio pa toilet drechi na e lugarnan di mas importante. E cantidad enorme di turista na Arashi, e hotelnan high-rise y Baby Beach regularmente ta conduci na keho di usuario di e cantidad creciente di pupu riba beach y den laman. Mesun amateurismo ta conta pa e circo di tur aña di plachi di number di auto.

E ‘maneho permisivo’ tradishonal riba practicamente tur tereno ta conduci cada bes mas na mas problema visibel. Si despues ta fiha ‘maneho nobo’ despues cu problema a sali for di man, di biaha esey ta ocashona problema nobo pasobra ta viola ‘ley di custumber’. Pesey tambe e maneho nobo di beach por conta cu hopi resistencia di e cantidad grandi di empresario individual na laman. E peliger ey tambe ta existi pa e cantidad grandi di quadracer riba caminda publico locual regularmente ta hiba na accidente serio. E cantidad creciente di vehiculo cu stuur na banda drechi cu ta haci cu pasamento di auto a bira un riesgo grandi. Pero tambe sa yama atenshon e amateurismo grandi ora ta introduci maneho nobo manera e ley nobo di cacho, ora ta resulta despues cu no a cumpli cu e rekesitonan mas basal pa ehecuta e ley. Pues ta parce cu ta inicia y ehecuta maneho na un manera sumamante inepto.

Mientrastanto a bira cla cu e gobiernonan consecutivo di color politico alternativo a percura pa confronta Aruba y su ciudadanonan cu debe gigantesco. Pero mester ta igual di cla cu ademas di un falta di integridad, tambe e gobiernonan tawata falta abilidad di maneho simpel pa maneha nos pais debidamente y pa haya solushon practico pa e problemanan di tur dia. En realidad nan a demostra asina cu ‘goberna’ pa nan ta un paso di mas y cu consecuentemente no ta asina solamente cu nan no kier (mal gobernashon), pero cu tampoco nan no por (gobernashon incompetente).

Si ta asina cla cu e gobiernonan consecutivo (t)a faya riba e dos terenonan esencial aki, e pregunta ta bin padilanti si e partidonan politico, cu pa decada a determina diseño di e ‘maneho’ aki y su ehecushon, por sigui carga e responsabilidad pa e maneho general y e administrashon di e cantidad enorme di placa di impuesto cu nan ta haya tur aña den nan man como gobierno.