2- INCENTIVO PA OBESIDAD!?

Den e prome articulo nos a mira con Theo a lanta den un ambiente na unda (come hopi) cuminda dushi ta normal. No ta nada straño cu el a bira yen di mas y asta obeso. Na un cierto momento el a realisa su mes cu pa su salud lo cumbini’e pa baha peso. Pero… esaki a resulta hopi mas dificil cu el a pensa. E dieta cu el a sigui tawata mucha dificil p’e. Kico pa haci awor? El a sinti su mes malo, pasobra e tawata convenci cu e mes ta responsabel pa su propio salud y pues cu e mes mester percura pa e perde peso y biba saludabel. Pa su suerte, e no tawata su so.

Casi tur hende cu kier baha peso tin mesun problema: nan sa cu ta hopi mas saludabel pa ta ‘flaco’, pero ora di tuma acshon, esey ta resulta hopi mas dificil cu nan a pre-mira. E motibo ta simpel y obvio, anke masha tiki hende ta mir’e. Nos comunidad (y esey no ta conta pa Aruba so!) ta asina custumbra cu cuminda procesa y un bida ‘sedentario’ cu nos no ta realisa nos mes con dañino e ta pa nos salud. Ta normal pa nos cumpra tur nos cuminda den supermercado na unda tur comestibel ta bunita empaketa. Pa tur alimento y ‘bebida’ tin un sinfin di selecshon y cada bes tin cos nobo cu ta atrae nos atenshon. Ta parce cu cada cos nobo ta mas dushi cu esnan di custumber. Ta dificil pa resisti tur e tentashonnan nos dilanti.

Tur esaki no ta nada otro cu resultado di investigashon cientifico cu empresa grandi a conduci den ´mercado´.

Nan a siña kico hende (y specialmente mucha!) ta haya dushi, kico ta hala su atenshon, ki ambiente mester crea cu color, musica y bista pa hende sinti bon pa nan cumpra mas facil. Pio ainda, nan a siña tambe cu hende por bira adicto na cierto producto den alimento.

Mescos cu fabricante a siña cu nicotina ta e causa principal di adicshon na cigaria y a uza e conocimento ey pa hisa nan benta, mescos sucu den cuminda ta duna hende un gustu grandi (practicamente un adicshon) pa sigui come mas di cierto producto.

Cu otro palabra, maske fabricante sa masha bon cu sucu tin consecuencia negativo grandi pa salud di hende, asina mes nan ta percura pa nan alimento contene suficiente sucu pa duna nan cliente ‘e gusto special’. Si esey ta conduci na adicshon na nan producto, ta considera esey mas bien un ganashi comercial.

Si na otro banda esey ta causa problema di salud pa un gran cantidad di hende cu consecuencia serio pa gasto di salubridad publico, no ta nan problema!

Mescos ta conta pa producto cu hopi vet aden. Ya caba pa varios decada ta adverti seriamente contra peliger di consumo exagera di vet. A resulta cu esaki tin consecuencia negativo directo entre otro pa malesa di ader y curazon. Esakinan te ainda ta e prome causa di morto na varios pais.

1. Prome cu tur cos ta importante pa concientisa tur hende di importancia di hiba un bida saludabel pa medio di campaña intensivo y di durashon largo. Alabes ta informa cualnan ta alimento ‘dañino’ y pakico y na ki manera por ‘remplasa’ nan.

2. Promove tur dunador di trabou (pues tanto gobierno como sector priva) pa stimula comemento saludabel y moveshon entre nan trahadornan. Regularmente ta organisa actividad cu ta rekeri participashon di e personal. E mesun principio aki tambe ta conta pa tur scol.

Ademas cu esaki ta ‘fastioso’ pa e persona mes den cuestion, e tin consecuencia masha grandi mes pa ‘salud di comunidad’. E gran cantidad di hende cu ta bira malo pa motibo di obesidad y no por sigui traha pa un tempo corto of mas largo, ta nifica un gasto grandi pa su compañia. Riba dje e tratamento di dokter, tur e examennan, medicina, eventual operashon cu estadia den hospital, tur esaki ta come masha hopi placa for di presupuesto di AZV y al fin y al cabo, di gobierno y pues di comunidad mes.

Pesey tambe ta hopi urgente pa henter comunidad tuma e problema di obesidad na serio y traha hunto pa promove un estilo di bida saludabel. Esey lo nifica di biaha cu ta stimula esnan obeso pa participa den e proceso aki pa nan propio bienestar. Kico asina por haci na nivel di comunidad?

3. Duna incentivo na e instituto/compañia/scol/individuo cu mas a destaca den progreso di ‘conciencia saludabel’. Asina salubridad ta bira ‘cool’ pa traha riba dje. Un incentivo atractivo por ta: reducshon di prima di seguro.

4. Den caso cu incentiva no ta yuda suficientemente: acudi na sancshon, p.e. na Inglatera ta duna boet na mayor cu ta mal-alimenta nan yiu(nan) cu consecuencia di bira obeso. Otro pais ta cobra prima di segura mash alto si hende ta persisti den custumber dañino.

Intenshon di e acshonnan aki ta pa crea un ambiente saludabel den comunidad. Comunidad mes lo beneficia masha hopi si hende participa masalmente na e acitividadnan.

Naturalmente cada individuo tambe tin su propio responsabilidad y posibel acshonnan den desaroyo di su salud. Pues ta bira tempo pa mira kico por haci na nivel personal. Esey ta tema pa e siguiente articulo.