4- UN PROGRAMA PERSONAL PA BAHA PESO

Den e 3 articulonan anterior por a lesa con (1) Theo a lanta for di tempran den un ambiente na unda come cantidad grandi di cuminda, cu hopi sucu y vet tawata algo masha normal mes. No tawata nada straño cu for di chikito caba el a crece for di ‘dushi pa kinipi’ te cu obeso. Maske e mes a ripara cu no ta nada bon pa sigui asina, a resulta hopi dificil pa cambia, pasobra tur rond di dje, tur atenshon den supermercado y riba televishon tawata enfoca riba come− y bebemento di yen di cos dushi (2). Pero un encuentro cu su bon amigo Federico Osorio cu a cont’e di su lucha contra obesidad y e solushon cu el a scohe (3), a haci cu Theo a bira hopi determina pa busca un solushon definitivo p’e mes.

El a cuminsa lesa hopi tocante e tema di baha peso y el a papia hopi cu hende cu tawata den mesun situashon cu n’e. Den esey el a ripara algo importante: casi tur hende cu a cuminsa yen di determinashon pa baha peso, a faya. Gran mayoria a cay bek den nan custumber bieu di comemento y despues di poco tempo no solamente a yega nan peso di antes, pero asta a surpas’e. No tawata nada dificil pa descubri cu casi tur hende kier a baha peso mucho lihe, a cambia nan custumber di come algo completamente otro di un dia pa otro, of a haya e sistema pa conta tur nan cuminda den caloria mucho complica. Ademas, hopi a cuminsa move cu hopi briyo pa kima mas caloria posibel, pero na caminda a perde e smak y disciplina pa sigui. Aparentemente nan a pone exigencia mucho halto pa nan mes. Pesey tambe Theo a dicidi pa cambia su custumbernan gradualmente pa asina duna su curpa tempo pa adapta.

Pa cuminsa, Theo a dicidi simplemente pa cuminsa come cada siman un tiki menos di tur cos sin cambia nada ainda riba kico e ta come. Pues el a enfoca prome riba cantidad. En bes di come tur dia 1 cup di aroz of 4 batata y un pida carni grandi, el a baha e cantidad y tamaño cada siman cu djis un tiki. Mescos el a haci cu e softdrinks cu e tawata bebe cu tur cuminda. En realidad practicamente e no a sinti mes cu e tawata come of bebe menos. Poco poco, den curso di algun luna, ya el a ripara cu e cantidad di cuminda y soft cu e tawata custumbra di come y bebe, a bira basta menos. Theo mes a keda sorprendi, specialmente ora el a realisa su mes cu e no a experencia mucho dificultad pa logra e meta aki. Ademas el a ripara cu e tawata sinti’e menos geblas despues di come. P’e, esaki tawata un estimulo hopi grandi pa sigui.

Den tur esey, Theo a realisa su mes cu e cantidad di cuminda no ta e unico cos cu mester cambia. Calidad tambe lo tin un efecto grandi. Pesey Theo a bira cada bes mas critico di kico e ta come. For di hopi tempo caba e tawata conciente cu locual e tawata come, no ta mucho saludabel. Asina e tawata sa cu softdrinks y bolo ta contene masha hopi sucu mes. No ta por nada cu tanto conocir di dje tawata sufri di e malesa di ´sucu´ y mester a sigui un dieta pisa pa evita situashon peligroso pa nan mes.

Pues el a haci tur su esfuerso pa cambia e soft cu e tawata bebe pa algo mas saludabel: juice di fruta y awa. Na comienso e mester a custumbra hopi, specialmente cu e sabor flauw di awa, pero gradualmente el a ripara cu awa ta un likido hopi fresco cu ta yuda kita sed hopi efectivo mes. El a cuminsa sigui ehempel di un grupo creciente di hende cu semper sa cana cu nan boter di awa.

Na mesun manera el a cuminsa pone mas enfasis riba comemento di varios berdura. Nunca tawata su custumber pa come berdura of fruta. Y ora di come lechuga of tomato mes, e sabor p´e no tawata nada atractivo. Pero…papiando cu amigo, el a bin ripara cu si combina varios lechuga cu otro y uza saus special, e ensalada cu e tawata crea, cu tomato, pida keshi, olijfi, etc., sa bira masha sabroso mes. Y mescos sa pasa cu otro berdura. Pues el a siña cu hopi berdura riba nan mes no por tin un sabor atractivo p´e, pero esey sa cambia masha hopi cu djis un tiki creatividad.

Como cu Theo a lesa tur caminda cu en realidad carni cora no ta mucho saludabel y ta mas aconsehabel pa come galiña y pisca, el a cuminsa haci e cambio den e direcshon ey. Tur esaki el a pone den un programa cu un durashon di varios luna pa e custumbra gradualmente cu tur e cambionan. Asina casi e

no a ripara mes tur e cambionan cu el a inicia pa mehora su salud.

Pero esey no tawata tur. Theo tawata conciente cu su obesidad tawata consecuencia no solamente di come di mas y robes, pero tambe di no kima suficientemente tur e energia cu el a ingeri. Theo a realisa su mes cu e mester dedica tempo y energia na actividad fisico. Algo cu nunca el a gusta mucho. Pero…su meta pa no solamente baha peso, pero pa ´simplemente´ bira mas saludabel den tur sentido, a convenc´e pa vence e obstaculo aki tambe. E tawata sa cu si e tuma e rumbo aki su so, e no lo wanta hopi tempo. Pesey el a palabra cu algun amigo pa topa varios atardi den siman pa cana of core bicicleta. Tur a bay di acuerdo. Y asina Theo a cuminsa move tambe. Na comienso e no por a wanta hopi, pero gradualmente el a sinti su capacidad aumenta. El a termina menos cansa y e por a aumenta e distancia. Esey a dun´e hopi motivashon. Y e no a sinti e actividadnan aki como un castigo. Al contrario, e encuentro cu su amigonan den otro ambiente a resulta hopi placentero y na un cierto momento el a asta sinti cu tanto e encuentronan como e actividad mes a bira un parti normal di su programa diario. Pero e recompensa mas grandi pa Theo despues di algun luna tawata cu no solamente el a baha peso na un manera cu casi e no a ripara mes, pero e tawata sinti su mes hopi miho y e tawata orguyoso cu e mes por a controla su propio desaroyo pa un mihor salud.

Theo tawata hustamente na tempo. Anke el a sufri di varios molester cu tawata afecta su salud, no a yega a fase ainda cu nan a tuma un rumbo fatal. Den e di 5 y ultimo articulo tocante e tema aki, Theo lo conta tocante algun di e efectonan mas serio di obesidad.