OBESIDAD. SUICIDIO GRADUAL!

Den e 4 articulonan anterior por a lesa con Theo a lanta for di tempran den un ambiente na unda come cantidad grandi di cuminda, cu hopi sucu y vet tawata algo masha normal mes. No tawata nada straño cu for di chikito caba el a crece for di ‘dushi pa kinipi’ te cu obeso (1). Maske e mes a ripara cu no ta nada bon pa sigui asina, a resulta hopi dificil pa cambia, pasobra tur rond di dje, tur atenshon den supermercado y riba televishon tawata enfoca riba come y bebe yen di cos dushi y vet(2). Pero un encuentro cu su bon amigo Federico Osorio cu a cont’e di su lucha contra obesidad y e solushon cu el a scohe, a haci cu Theo a bira hopi determina pa busca un solushon definitivo p’e mes (3). En berdad, a base di hopi determinashon y disciplina, Theo a logra di baha peso y cuminsa hiba un bida mas saludabel (4). El a descubri hustamente na tempo cu su forma di biba cu a haci di dje un persona obeso, no tawata nada otro cu un suicidio gradual. Den e di cinco y ultimo parti di e serie ´Bo salud ta den bo man!?´ Theo lo conta con el a yega na e conclushon dramatico aki.

Den tur su lesamento tocante e tema di obesidad, Theo a descubri cu obesidad ta un fenomeno cu apenas e ultimo decadanan a tuma un rumbo hopi precupante. No solamente ta trata di un grupo di adulto obeso cu ta crece tur aña na un forma espantoso, pero e grupo di mucha y adolecente obeso tambe ta crece na un manera precupante.

Pesey tambe a cuminsa considera e fenomeno aki como un epidemia. Awendia, come di mas den combinashon cu inactividad ya caba ta un di e causanan principal di morto (prematuro).

E ultimo 1000 añanan perspectiva pa hende biba mas largo a aumenta gradualmente. Specialmente for di mita di siglo 19 esaki a haya un impulso importante pa motibo di mehorashon di e circumstancianan di biba y e adelantonan den mundo medico. Conciencia mas general di higiena a hunga un papel importante den esaki. Pero e ultimo 30 añanan a ripara cu e patronchi historico aki e cuminsa mengua. Ta parce cu obesidad tin un impacto negativo riba e desaroyo aki. Esey no ta nada straño, mirando e echo cu obesidad ta reduci e perspectiva di bida di individuo.

Estudio a mustra cu hende cu sobrepeso por lo general ta perde 2 aña di nan bida, hende obeso 2 pa 4 aña, mientras cu hende cu obesidad morbide asta por perde 8 pa 10 aña di nan bida. Como cu ya caba ta trata di un cantidad masha grandi di hende obeso den varios comunidad, ta claro cu e tin un efecto tambe riba e perspectiva di bida di henter un populashon. Asina a calcula cu na aña 1999 na Merca 300.000 hende a muri pa consecuencia di obesidad.

BMI: Body MassIndex: unmetodocu ta compara peso (den kilogram) den relashoncutamaño di curpa (den kwadraat di largura den meter). E formula ta birakg:m2. Por ehempel, un persona cu ta pisa 78 kg y ta midi 1.85 m tin un BMI di 78:(1,85)2=22.8 Sa uzaresultado di BMI internacionalmentemashahopipasobra a riparacu tin unrelashonhaltoentre BMI y e porcentahe di vet den curpa.

Ta considera un BMI saludabelsi e ta entre 18 cu 24,9. For di 25 te cu 29,9e persona tin sobrepeso . Di 30 pa 39,9 ta considera un persona obeso. Den casocu BMIta pasa40e persona ta cay den categoria di obesidadmorbide. Esey kier men cu suobesidad ta asina grave cu e tin hopichens pa problema di salud of enfermedadserio. E situashonakiporconducina handicap serio y astamorto.

POSIBEL EFECTO DI OBESIDAD DURANTE BIDA

Por lo general un persona obeso no ta muri simplemente mas tempran cu ´hende flaco´ pero prome di esey (t)a pasa un parti importante di su bida cu consecuencia fastioso di su obesidad. E efectonan mas conoci ta preshon halto, diabetes (tipo 2, esta diabetes cu no ta depende di insulina), trastorno di metabolismo di vet cu cada un of conhuntamente ta contribui na un riesgo mas grandi pa enfermedad cardiovascular. Esaki al fin y al cabo por resulta den un atake di curazon of un atake celebral. A base di un regimen severo di medicina y dieta, en combinashon cu mas moveshon ta purba combati e efectonan aki. Pero hopi biaha ta resulta cu paciente no tin e disciplina necesario pa vence nan adicshon na cuminda cu hopi sucu y vet.

Casi mesun serio ta cu sobrepeso y inactividad ta un causa importante tambe pa varios tipo di cancer, pa roncamento pisa y problema di respirashon, specialmente ora di drumi. Ta conoci cu hende obeso tin mas problema cu nan articulashonnan di rodiya y pia, pero menos conoci ta e problemanan psycosocial. Depreshon, miedo y un propio imagen negativo ta haci cu e salud mental, banda di esun fisico, tambe ta bira un fuente di precupashon. Ta logico cu si varios di e simptomanan aki tuma luga den bida di un persona obeso, su calidad di bida no ta mucho di gaba.

EFECTO PA COMUNIDAD

Pa comunidad e incidencia halto di obesidad tin consecuencia serio. Ta trata por ehempel di e gastonan involvi cu bishita mas frecuente na docter, tratamento mas largo cu mas medicina, eventual estadia den hospital y cuido na cas.

Obesidad no solamente tin consecuencia pa e gastonan medico, pero tambe pa empresa y comunidad. Ta conoci cu productividad sa baha pa motibo di aumento di A.O. pa corto y largo tempo y pa morto prematuro. Enfermedad di largo durashon, handicap of morto prematuro por nifica perdida (parcial) di salario mientras cu ta perde capital humano pa economia.

Estudio a demostra cu gasto medico pa un obeso por lo general ta mas cu 35% mas halto cu pa ´hende flaco´. Asta ta asina na Merca, cu e gastonan pa trata paciente obeso a supera e gastonan envolvi pa tratamento di paciente cu cancer.

KEN TA PAGA ?

A bira cla cu obesidad ta trece problema fisico y mental pa e individuo. Pero pa comunidad tambe e tin efecto negativo grandi cu ta costa hopi placa. E pregunta ta, ken ta paga e gastonan extra aki? Na momento cu ta trata di tratamento medico, AZV ta paga (casi) tur gasto. En realidad, AZV ta un seguro obligatorio pa tur hende a base di solidaridad. Pero kico ta solidario?

Ta logico cu si mas hende hiba un bida di come (hopi) di mas y move (mucho) tiki, e cantidad di hende obeso lo sigui aumenta. Mas hende obeso ta nifica mas gasto medico. E gastonan aki por subi di tal forma cu e placa cu AZV tin disponibel ya no ta suficiente mas. Pues mester subi premie di AZV (of BBO!?) pa yuda AZV carga e gastonan extra aki. Kier men cu tur hende, tambe esnan cu ta hiba un bida sano di come modera y move hopi mester paga. E pregunta ta si esey realmente ta e intenshon di solidaridad, pues si ta logico pa tur hende keda paga sin mas pa un comportashon no-saludabel cu ta cambiabel. Pasobra di e manera aki no tin ningun estimulo pa hende purba hiba un bida saludabel.

Naturalmente e problema aki no ta hunga na Aruba so. Pesey hopi compañia di seguro internacional a introduci e sistema di cobra un premie mas halto di hende cu ta hiba un bida cu mas riesgo (huma, uza droga, come hopi, inactividad). Como cu a resulta cu obesidad na edad tempran tin efecto negativo hopi grandi pa salud di e persona den futuro y pa comuidad, un pais manera Inglatera a cuminsa multa mayor cu ta lanta nan yiu na un sistema cu ta ocashona obesidad.

Pa salud fisico y mental di pueblo di Aruba y pa salud financiero di AZV y pais Aruba tambe a bira tempo pa refleha riba e mihor strategia pa logra e metanan aki. Na prome lugar ta necesario pa concientisa tur hende di e necesidad di hiba un bida saludabel. Esey ta rekeri un campaña intensivo. Na di dos lugar mester ofrece comunidad e posibilidad pa participa na programa pa hiba un bida saludabel. Y na di tres lugar ta inevitabel pa laga tur hende carga e consecuencianan di nan propio escogencia despues cu tur intenshon pa yuda nan cambia nan estilo di bida a faya.

Dor di informa su mes debidamente, Theo a realisa su mes cu e mes mester asumi su responsabilidad y tuma iniciativa pa cambia su bida den un direcshon positivo. Cu hopi esfuerso y perseverancia el a logra su meta. Ta di spera cu hopi mas hende lo sigui su ehempel.