3- UN LUCHA PERSONAL CONTRA OBESIDAD

Den e di dos articulo tocante e tema di obesidad a mira con dificil ta pa resisti e atracshon di tur cos dushi rond di nos tur. Pa tin mas chens pa cada persona hiba un bida saludabel, ta necesario pa crea un ‘ambiente saludabel’ den comunidad. Esey kier men cu masalmente ta pone mas enfasis riba cuminda saludabel y actividad fisico. Comunidad mes lo beneficia masha hopi si mas tanto hende posibel bira mas conciente di nan salud y participa na gran escala na acitividad fisico.

Theo mientrastanto a crece bira cada aña mas obeso. Moveshon cada bes a bira mas dificil p’e pasobra e sa cansa sin haci nada. Y docter regularmente sa advierti’e cu su preshon halto. Pa su suerte el a yega na un edad na unda el a realisa su mes tur e retonan di cuminda y snack sabroso rond di dje. Claro cu e no por a tira tur culpa solamente riba negoshi cu kier bende mas cos dushi posibel pa haci mas ganashi. El a sinti cu e mes tin su propio responsabilidad pa su salud. Pesey tambe el a cuminsa mira kico e mes por haci na nivel personal. Net den e tempo ey el a topa su amigo di hopi aña Federico Osorio. Federico semper tawata mescos cu Theo yen t’e obeso, pero pa sorpresa di Theo, el a baha peso na un manera increibel desde ultimo biaha cu nan a topa. Naturalmente el a puntra Federico con el a logra esey. Tawata un historia impresionante.

Federico a conta con na aña 1997 e tawata asina obeso (mas di 160 kilo) cu e por a bisti solamente carson (size 52) traha dor di sastre. E tempo ey e tawata adicto na comemento. Ora di sinti fastioso, comemento na abundancia tawata e miho manera p’e sinti bon atrobe. Claro cu e tawata experencia algun problema: su curason tawata birando grandi, su preshon mucho halto y anochi su rosea sa para ora di drumi, obstaculisando asina e fluho di oxigeno pa su celebro (sleep-apneu). Como consecuencia, mainta casi e no por lanta foi soño y durante dia e sa pega soño, asta na trabou. E situashon a bira asina serio cu el a cay den un soño profundo tras di stuur di su auto y a dal un auto su dilanti cu tabata wardando luz di trafico bira berde. Pa Federico esaki tawata e señal cu cos no por sigui asina. For di examen medico a resulta cu su obesidad tawata un motibo importante pa su respirashon para regularmente ora di drumi. Docter a splik’e cu ademas di cansancio den dia, esaki lo por causa pronto un atake celebral of di curason pa motibo di falta di oxigeno. Pa contra-aresta esaki, Federico mester a drumi anochi cu mascara riba su cara, conecta cu un CPAP cu ta manda aire p’e henter anochi (CPAP: un machin chikito cu ta pomp aire/oxigeno pa un patient cu sleep-apneu). Esey no tawata nada facil. Pero Federico a realisa su mes cu mester tuma medida mas drastico pa recobra su salud.

Pesey el a bay Colombia na comienso di ’98 pa kita mas vet posibel pa medio di operashon (liposucshon). Den combinashon cu un dieta special el a logra baha su peso te na 122 kilo. Bou di guia di docter y dietista na Aruba esaki a sigui baha despues te na 98 kilo. Federico tawata sinti’e hopi bon mes!

Pa su mala suerte, algun aña despues, situashon desagradabel na trabou a cuminsa precup’e. Pa combati e sentimento fastioso ey, el a cuminsa come di mas atrobe. Hopi di mas: porcion grandi di cuminda chines despues di a come su bon tayo di cuminda na cas. E tabata bolbe come afo scondi sin cu su señora sa. Y tur cos acompaña di glas grandi di refresco. Esta dushi, pero…di mes dentro di poco tempo su peso a subi bek te na 148 kilo. Cada bes e mester cumpra un size mas grandi di carson te yega size 48. Atrobe su preshon di sanger a subi y e biaha aki el a cuminsa mustra simptoma di diabetes (pre-diabetes). Specialmente su pianan a cuminsa hincha pasobra su barica tawata obstaculisa e fluho di sanger for di su pia pa su curazon. Herida no tawata cura normal pero sa tuma dos pa tres luna prome cu esaki cura. Un situashon precupante. Su BMI a subi te 41 locual a pon’e den categoria di obesidad morbide. Esey kier men cu su obesidad tawata asina grave cu chens pa problema di salud of enfermedad serio a aumenta masha hopi mes. E situashon aki por hiba na handicap serio y asta morto. Atrobe Federico a dicidi pa tuma medida drastico pa medio di operashon.

BMI: Body Mass Index: un metodo cu ta compara peso den relashon cu tamaño di curpa. Sa uza resultado di BMI pa haya un indicashon si un persona tin sobrepeso of peso di menos. Ta considera un BMI saludabel si e ta entre 18 cu 25.

E biaha aki el a dicidi di haci operashon na Aruba mes. Tawata trata di un operashon pa ‘haci su stoma mas chikito’ (gastric bypass), ehecuta dor di cirujano dr. Alex Ponson. For di algun dia prome cu operashon, Federico mester a mantene un dieta stricto di thee, bouillon y jello. Claro cu mientrastanto Federico a informa su mes completo riba tur procedimento di e operashon. Y claro tambe cu e tawata nervioso, pasobra tur operashon tin su riesgo. Pero e tawata dicidido y por fin el a wordo opera dia 2 di december 2013.

Manera por mira riba e ilustrashon: en realidad a ‘by-pass’ (elimina) gran parti di stoma. Como consecuencia e curpa por acepta cantidad chikito so di cuminda mientras cu cuminda pisa (manera carni cora) y vet ta bira hopi dificil te casi imposibel pa digeri.

Di mes, e prome simannan despues di operashon, Federico mester a sigui un dieta hopi stricto y likido solamente. Den apenas 2 siman despues di operashon, ya su peso a baha te na 122 kilo. Poco poco por a extende e alimentonan, pero te awendia Federico ta sigui come porcion chikito, casi nada di carbohydrato y otro alimento pisa manera vet, ni producto cu ta contene alto contenido di sucu. El a tuma su salud masha hopi na serio y ta come hopi mas saludabel: fruta, verdura, hopi pisca, lechi di soya y primordialmente cuminda cu ta contene proteina. Pa tur seguridad, e ta tuma varios suplemento di vitamina. Pesey tambe su peso a sigui baha te yega na apenas 95 kilo den luna di mei 2014.

Pero e bentaha principal p’e ta cu por fin e ta sinti su mes alivia. Su salud y pues su calidad di bida a mehora drasticamente! Pa su señora tambe e resultado aki a nifica un cambio hopi positivo den su bida!

Ora Federico a caba su historia, Theo a keda hopi impreshona. Eynan mes el a dicidi pa sigui e ehempel di Federico, esta di tuma su salud na pecho, dunando e prioridad cu mester. Claro cu e no a pensa di biaha riba mesun tipo di operashon. E lo tuma e paso drastico ey si nada otro a yuda y su salud core peliger pisa. Al fin y al cabo, ta trata di un operashon grandi cu di mes ta trece riesgo cu n’e. Despues di despedi di Federico, Theo a bay cas cu e meta fiho pa traha un programa cu lo beneficia su salud. Den e siguiente articulo nos lo mira kico Theo a logra.