1- BO SALUD TA DEN BO MAN!?

Mientras cu aña tawata pasa, Theo a pasa di yen pa diki y di diki pa obeso.

Esey tawata fastioso, pasobra e no por a core hunga mas cu su amigonan na scol basico. Di mes e no por a core duro y di biaha e sa cansa. E parti mas fastioso tawata cu su amigonan tawata ter’e tur ora cu su gordura.

Mas grande Theo bira, mas el a cuminsa realisa su mes cu tur e comemento y bebemento di cos dushi no tawata cumbini’e. Despues di come su tayonan yen yen di cuminda, e tawata sinti su mes manera heblas. Y rond di dje el a cuminsa ripara cu hopi hende cu mesun apariencia, no tawata sinti nan mes mucho bon tampoco. Algun tawatin e malesa di ‘sucu’ cu a obliga nan pa laga hopi coi dushi para. Otronan a haya atake di curazon of tawatin problema cu respirashon of…. Tawata un lista largo.

Theo a spanta y a cuminsa informa su mes. Y locual el a lesa a convenc’e cu miho e no sigui su bida manera di custumber. Pa e sinti mihor y asta biba mas largo, e lo mester haci cambio drastico hopi lihe mes.

Theo a pone man na obra. El a busca informashon ki dieta pa sigui y el a cuminsa cu hopi brio. Di un dia pa otro el a dicidi pa no come bolo mas ni bebe soft. Pastechi, croquet, cheeseball y tur otro cos dushi ela laga para. E tawata bebe awa so cu un tiki fruta mainta, un pida pisca cu berdura merdia y un buscuchi cu keshi fini anochi. Asta el a cuminsa cana un ora pa dia band’i laman.

Cinco dia despues su barica tawata gruña sin pordon y e tawata mustra skel di hamber. Pero, ya caba el a perde casi 1 kilo.

Esey a dun’e forsa pa sigui su bataya. Tawata trata di un bataya hopi fuerte mes: esta purba di deshaci di un custumber di masha hopi aña, di come y bebe kico cu ta y sin limite pa un dieta hopi mas ‘serio’ y na su parecer cu menos ‘sabor’.

Pa masha hopi hende, no solamente na Aruba pero na casi henter mundo, esaki ta un problema hopi grandi. E no ta conta pa comemento so, pero na casi mesun manera pa humamento, uzo di alcohol y otro ‘vicio’. Cu tur informashon disponibel awendia, hopi hende ta realisa nan mes cu obesidad, humamento, alcoholismo, etc. en berdad lo por forma of ya caba ta un problema pa nan. Un gran parti di hende realmente kier trece cambio den nan bida, pero na caminda nan ta realisa nan mes cu esey no ta dje facil ey. Aparentemente e curpa a custumbra asina hopi cu e ‘vicio’, cu e ta protesta contra cualke intento pa trece cambio pa miho. Ta rekeri hopi firmesa pa sigui e lucha pa un cambio positivo.

Claro cu ta facil pa bisa cu hende mes ta responsabel pa nan salud y pues nan bida. Cu otro palabra, si un hende ta malo pasobra e ta come y bebe na un manera insaludabel, of e ta sigui huma of uza droga na granel, ta e mes a scohe y e no tin su propio salud na pecho. Pues ta trata di persona iresponsabel.

Pero esey ta mucho facil. Mescos cu Theo a lanta cu un custumber cu ningun hende a bis’e cu esey por perhudic’e, hende sa lanta cu concepto ekiboca di custumber. Asina humamento, bebemento di alcohol y uzo di droga den hopi circulo ta muestra di machismo. Y tiki hende lo reconoce cu nan no tin control (mas) riba e uzo y efecto di locual nan ta ingeri. Pa trece cambio despues di hopi aña ta resulta dificil.

Kico pa haci anto? Di antemano ta trata di un lucha perdi? Esey en todo caso no! Pero no ta un proceso facil. En berdad pa varios enfermedad y custumber negativo bo por tin e proceso pa un parti den bo mes un man, pero e exito final hopi biaha ta depende di varios otro factor importante. Den e siguiente publicashon lo profundisa mas riba e factornan aki y alabes lo trece ehempel di un plan concreto con pa hiba e lucha cu (mas) exito.